Naš je Marko uvu šetimanu dobija plaketu Jurine i Franine za besidu Drago Orlić 2025/2026. Zato bi bija red da u ten tonu bude i uvi članak. Ki kapi će kapiti, ki ne nek nan skuža uvi put.
Postoje ti niki ljudi ki ti se uvuču pod kožu od prvega dana. Takov je Marko Bijažić. To je čovik ki je sa svojin glason, besidon i štorijama iz cile najdraže nan Istre uša u svaku istrijansku hižu. Nakon ča je dela kaj učitelj u Žminju, Gologoričken Dolu, Pazinu i Podpićnu, za ča se je i školova u Puli i Riki, 1976. počinje delati kaj đornalista na Radio televiziji Zagreb, sada Hrvatskoj radioteleviziji. Tako je ubaša cilu Istru i zna svaki kantun i svako selo. Istina, malo ga sad mute sve te nove hiže z bazeni, apartmani i hoteli ki su uništili istrijanska sela, ali ča je tu je.
U penziju je poša 2014., ali i dalje nima mira. Rođen kvarnar i devete i dalje dela kako mladić od trideset i šest, a ne sedandeset i šest lit. Danas je svoje radijske minute zamjenija s video pričami. Nikad ste ga mogli samo čuti, a danas ga i vidite na televiziji u emisiji Boje zemlje. A piše i tekstove za istrijanski kalendar Jurina i Franina.
I baš na predstavljanju tega libra, prije par dan, dobija je plaketu Jurine i Franine za besidu Drago Orlić 2025/2026. Ni ča je naš, ma je zamerita.
Marko voli svoje Bijažiće, voli svoju Istru i njezinu besidu. Zna sve istrijanske običaje i pučke izreke i pošalice. To sve morete najti u njegova dva libra ča je napisa. Nan je reka da ne bi više načinija libar nikako, ali ima on još čuda tega za reći.
Nakon ča je dobija zasluženu plaketu, reka nan je i da je više od trideset lit pisa tekstove za Jurinu i Franinu. Prvega je napisa, 17.1.1983., a sve skupa je napisa oko 800 kartica teksta za Glas Istre, a skoro 5000 za Radio Pulu. Za Glas Istre je pisa do 1990., a na radiju do penzije. Da samo to gledamo, već je zamerita. A kadi su još sve štorije o selu i poljoprivredi, običajima i tradiciji po čemu ga danas svi poznaju.
Marko i dalje piše, ali govori kako će besida nestati kako ča je nestalo i selo, kako ča su nestali i običaji. Koliko god se borimo, ona sama po sebi nestaje. Ali fala Bogu da je još takovih, pa smo još niko vrime na miru.
Moramo spomenuti da ovo lito slavimo i deset lit kako delamo skupa. Počeli smo na Agroistri, a pokle skupa počeli delati Boje zemlje. Ako je ki zaslužan ča Boje zemlje postoje, od samega imena do svega drugega onda je to sigurno Marko. Skupa smo ubašli cilu Istru, skoro svako selo, brajde i ulike. Koliko smo štorij učinili, nisan rivala pobrojiti jer san se štufala kad san pasala sto.
Naš radni dan počinje u Vodnjanu, na kafelu ko nedaj Bože da ja platin. Dok se zlajemo brzo dojde vrime za partiti. Ča ćemo i kako ćemo dogovaramo se većinom dok se peljemo. Često smo kasni, jer moja ura vajk kasni pa nikako da dojden na vrime. To je možda jedina stvar ku me ni riva naučiti, da novinar vajk mora biti na vrime. Ali pušmo to. Naučija me čuda tega.
Koliko smo samo sela ubašli, ljudi poslušali. Toliko je uspomena koje i danas žive u našin reportažami. A još hi je puno i usprid nas.
Marko fala.
Ki zna zna, ki ne, neće nikad znati.
